Það hefur heldur mikið gengið á hjá mér seinustu vikur. Við fjárfestum í nýjum skáp úr IKEA fyrir hálfum mánuði, hurðirnar voru ekki til en við fengum þær í dag.
Það er meira djöfulsins málið að setja saman þessi helvítis IKEA húsgögn, sem eiga að vera fíflheld. Miðað við skapsveiflurnar hjá feðginunum þetta kvöld kvíði ég því að setja hurðirnar upp!

Þar á undan gerðist sá merki atburður að ég útskrifaðist frá FB. Í framhaldi af því sótti ég um stjórnmálafræði við HÍ og er kominn inn, enda verðlaunadrengur hér á ferð! Já, ég var kallaður upp fyrir framan allan salinn þar sem mér voru veitt verðlaun fyrir framúrskarandi námsárangur í umhverfisfræði. Ég fékk í verðlaun þessa stóru, fínu bók sem heitir Dýrin.

En áður en ég útskrifaðist dimmiteraði ég. Ég held að orðið “vá” nái ekki að lýsa því hversu vel ég skemmti mér þann daginn og hversu timbraður ég var daginn eftir.

Annars er það kannski nýjast í fréttum af mér að ég gerðist, svona í tilefni af umhverfisfræðinni, umhverfisvænn. Ég keypti mér þriggja mánaða strætókort í fyrradag. Það er óþarfi að keyra alla leið niður í bæ og til baka á hverjum degi. Ég geng núna í tvær mínútur út á stoppistöð, tek einn strætó alla leið niður í vinnu, er ekki hálftíma á leiðinni og er kominn ca. tíu mínútum fyrir opnun. Á þessu græði ég kannski ekki mikinn bensín pening, en ég þarf aldrei að leita að stæði, menga mun minna og get lesið á leiðinni eða horft á bíómynd í iPodnum. Meira að segja stefnir allt í að ég nái að klára A Long Way Down eftir Nick Hornby á næstu dögum vegna þessarra strætóferða, eftir marga mánuði af lestri. Ég gef mér ekki tíma í að lesa þegar ég er hérna heima, tek alltaf sjónvarp eða tölvu fram yfir lesturinn.

Ég fór líka í nískubíó síðasta þriðjudag á hina umtöluðu mynd, The Hangover. Jafn skemmtilega og fyndna mynd hef ég ekki séð í mörg ár. Höfundunum tókst að þjappa öllum fyndnustu og bestu viðbrögðum, atburðum og kringumstæðum sem hægt er að hugsa sér í 90 mínútna mynd. Þó myndin hafi ekki verið jafn fyndin og ég átti von á var hún samt sem áður svo fyndin, skemmtileg og vandræðaleg að hún uppskar hreina tíu hjá mér!

Á morgun (eða í dag) er stefnan sett svo á útilegu með Frank stóra bró og fleirum við Apavatn.

Hægt er að fylgjast með öllum kvikmyndum sem ég horfi á hérna uppi í “Kvikmyndir og tónlist” tabinu.
Myndir úr útskriftinni og dimmiteringunni er hægt að sjá hérna í “Myndir” tabinu.

Við fórum í loftið um sjö leytið á þriðjudagsmorgni. Við vorum komin til Köben um hádegi að staðartíma. Glampasólskin sem tók á móti okkur. Við tókum leigubíl að gistiheimilinu sem við vorum á, og sjokkið sem ég fékk þegar ég kom þangað. Arna fór með FB til Danmerkur fyrir ári síðan og var á sama heimili, og hún sagði að þetta væri kósý; lítið og heimilislegt.
Ég mætti þangað og þetta var skítugt, subbulegt og þröngt. Mér leist ekkert á blikuna. Þetta vandist þó strax á fyrsta degi og þegar ég var að fara fannst mér ekkert að þessari aðstöðu, í þokkabót gistum við þarna hræódýrt (eigandinn er mamma kennara í skólanum).
Við höfðum alveg frjálsar hendur þennan daginn og við kíktum held ég öll á Strikið. Eyddum bara öllum deginum þar og drukkum okkur svo haugafull um kvöldið heima í húsinu.

Á öðrum degi tók námið við. Við vorum ræst eldsnemma, kl. 6.30 (eftir drykkju kvöldið áður og ekki búin að venjast dönskum tíma!), til þess að fara til Fredericia þar sem FB er í samvinnu við Fredericia Gymnasium (þetta er ekki líkamsræktarstöð, gymnasium er framhaldsskóli á dönsku). Dagurinn var einstaklega leiðinlegur og langur. Við vorum ekki komin til baka fyrr en um 22. Þá drukkum við okkur aftur haugafull. Það var fjör.

Á þriðja degi komu Fredericia líkamsræktarfrömuðirnir til okkar í Köben, þar sem við kíktum í Kaupmannahafnarháskóla. Þar hlustuðum við á mjög áhugaverðan fyrirlestur frá manni sem fer reglulega til Grænlands og Suðurskautslandsins til að bora í jöklana. Við fengum að sjá hjá honum borkjarna í -28°C köldu herbergi. Við sáum m.a. loftið sem Jesú á að hafa andað að sér og elsta DNA í heimi (Guinnes staðfest). Restin af deginum er ekki alveg ljós, en mig minnir að við höfum eytt henni niðri í bæ á Strikinu.

Fjórði dagurinn fór hjá mér í Bakken-tívolíið. Aðrir vöknuðu eldsnemma um morguninn til þess að fara í dýragarðinn en ég lét mig ekki hafa það enda var drukkið kvöldið áður. Dagurinn var alveg frábær og skemmtum við Arna okkur frábærlega í Bakken. Um kvöldið splæsti Villa, eigandi gistiheimilisins, í pylsupartý handa okkur og haldin var kvöldvaka þar sem hvert herbergi var með skemmtiatriði. Þarf ég að taka það fram að við drukkum?

Á laugardeginum fórum við á safn og sáum þrívíddarmyndina Fly Me To The Moon. Ég var ekki að höndla þrívíddina þar sem þetta dót fer misvel í mig og ég náði engum fókus á tjaldið, þá ákvað ég að reyna að leggja mig þarna, sem heppnaðist. Eftir það fórum við í Kristjaníu í svona korter því ég á svo mikla hetjukærustu sem fannst sér vera ógnað þarna. Ekki var því mikið skoðað þar, en það litla sem ég sá var ótrúlegt. Hasslykt, umhverfið almennt, fólk og bara alltsaman var alveg ótrúlegt. Ég var kominn inn í allt annan heim. Krakkarnir sögðu að ég passaði vel inní; í wife-beater og með bjór í hönd. Við fórum aftur á Strikið eftir að hafa verið í Kristjáníu og átum á Jensens Bøfhus um kvöldið.
Á myndinni hérna til hægri stend ég á tveimur ríkjum, vinstri fóturinn í Kristjaníu og sá hægri í Danmörku.

Seinasti dagurinn var góður. Á föstudeginum hafði ég, ásamt einhverjum fleirum, gengið niður á strönd sem var í ca korters fjarlægð. Þar sáum við þessa þvílíku aðstöðu til að dýfa sér í sjóinn, liggja í sólbaði og éta nesti eða whatever svona 30 metra út í sjónum. Maður komst með því að ganga þangað á viðarbryggju. Við gerðum díl á föstudeginum að við myndum synda í sjónum daginn eftir! Þar sem við komumst ekki á ströndina á laugardeginum ákváðum við að gera það á sunnudeginum. Ath. að það var eini dagur ferðarinnar þar sem var engin sól, þannig að ég var ekki alveg jafn brattur við að fara út í sjóinn. Djöfull var hann kaldur! Meðfylgjandi eru tvö myndbönd af mér í sjónum. Eftir stutt sjósund fór helmingur hópsins í Field’s verslunarmiðstöðina þar sem ég fann mér loksins eitthvað annað en mat og áfengi að versla. Ég gat keypt mér tvær skyrtur!

Við áttum að fara í loftið 00.10 að dönskum tíma, en þegar við komum á völlinn seinkaði fluginu til 01.20. Við drápum tímann með Jungle Speed, þannig að þetta var ekki handónýtt. Fluginu seinkaði ekki meira, en sökum seinagangs einhverra aðila löbbuðum við ekki inn í vélina fyrr en 01.20; þegar við áttum að vera að fara í loftið. Við vorum þess vegna meira en einum og hálfum tíma seinna í loftið en áætlað var.
PS. Ég drakk ekki þetta kvöld. Ótrúlegt.

Allar myndirnar eru komnar á picasaweb.

Hérna er Þorbjörg kennari að synda. Hún synti fyrst okkar og er hér að synda aðra ferðina.

Kiddi, ég og Valdimar að stökkva ofan í. Takið eftir því hvernig Kiddi rétt stekkur ofan í og snýr strax við. Þetta var vel planað hjá stráknum.

Ég nota sömu mynd og í fyrra um hvernig stæðin eiga að vera (smellið fyrir stærri mynd):

Í morgun var þetta hinsvegar svona (ég póstaði rangri mynd áðan, það voru fjórar raðir í kös; ekki þrjár):

Þarf að segja eitthvað fleira?

Ég tók þá ákvörðun í vikunni að fara ekki á árshátíðina. Ballið sjálft er ekki svo skemmtilegt, og það skemtilega við árshátíðina er fordjammið og eftirpartýin á hótelinu. Þar sem Arna er ekki átján má hún ekki gista og ég nenni ekki að gista þarna án hennar, og að auki spara ég mér tíu þús kall! Og enn að auki eru einhverjir búnir að plana djamm í Reykjavík.
Í Sæludögunum er dagskrá þar sem þú getur valið milli fjölda hópa sem þú getur farið í. Ég valdi mér billiard-mót á þriðjudeginum, Twister spilið fyrir hádegi á miðvikudeginum og LAN eftir hádegi. Ég valdi LAN líka í fyrra en það endaði fljótt. Dó eftir korter í Warcraft.
Ég ætlaði mér svo að komast í sofa-út hópinn, en það er eftirsóttasti hópurinn jafnframt því að vera sá fámennasti. Fimm manns komast í hann, og það er hringt í fólkið sem fær að sofa út á klukkutíma fresti til að gá hvort það sé ekki örugglega sofandi!

Mestu máli skiptir þó árshátíðar-útvarpsstöðin Skank FM 89.0, þar sem mér var boðið að vera með þátt. Ég tók því og hóaði saman nokkra stráka – Gísla, Arnar Gísla og Valda – og við ætlum að vera með þáttinn Testosterón, því var breytt úr 111 Síðdegis. Eins og við er að búast vera strákahlutir þar til umræðu og strákatónlist.
Testosterón verður bara einu sinni á dagskrá, þriðjudaginn 4. mars milli 16 og 18!

Ætla að bæta smá við. Til að benda fólki á hversu mikill dýragarður myndast hérna í FB þegar það snjóar og hvítu bílastæðalínurnar hverfa. Svona lítur þetta út á góðum degi, það náttúrulega taka einhverjir bílar tvö stæði, en svona leggja bílarnir venjulega og svona liggja bílastæðalínurnar – smellið á myndirnar fyrir stærri útgáfu:

Svona hins vegar löggðu bílarnir í morgun. Það þarf varla að taka það fram að ég horfði á marga í bílunum sínum eftir fyrsta tíma að reyna að finna út hvað þeir ættu að gera og hvernig þeir ættu að losna:

Það er alveg ótrúlegt hvað fólk er ótrúlega ótillitsamt og bara hreinlega HEIMSKT. Kommon! Ef þú aðeins horfir í kringum þig sérðu að þú ert búin/n að loka einn bíl inni. Fokking heimska fólk.

Fjölmiðlafræði 203: 8
Enska 403: 8
Íþróttir 242: 7!!!
Íslenska 403: 6
Saga 103: 5
Spænska 203: 5

Ég er sáttur með þetta, enda þarf ég á öllum mínum einingum að halda eigi ég að klára á réttum tíma. Er núna búinn að klára 85 einingar af 140, en ég er held ég fimm einingum eftir á.
Ég tók tvö próf eitt daginn og var í fríi einn af þessum fjórum dögum. Prófin tvö sem ég tók sama daginn fékk ég fimm í sitthvoru.

Þannig að ég er búinn að vera að vinna í rúmar tvær vikur og er byrjaður að vinna jólavaktirnar; 12 tíma. Mér finnst það fínt, les eða eitthvað þegar það er rólegt að gera en þegar það er brjálað að gera er það best. Allir á fullu og búðin pökkuð af fólki.
—
Er að lesa Gyllta Áttavitann núna í annað skiptið, í tilefni myndarinnar sem byggð er á bókinni sem kemur út á annan í jólum. Alveg mögnuð bók, nýti hvert tækifæri sem ég fæ til að lesa í henni. Stíluð sem barnabók, og er það eflaust. Ég og pabbi lásum hana þegar ég fékk hana og þó ég sé að lesa hana aftur, rúmur þremur árum seinna; nokkrum skeggbroddum og punghárum fleiri, er hún alveg jafn góð! Ætla svo að lesa líka hinar tvær bækurnar í þrennunni; Lúmska Hnífinn og Skugga Sjónaukann þegar ég klára allt sem ég ætlaði að klára að gera í jólafríinu, sem ég er ekki byrjaður á.
—
Tók strætó áðan í fyrsta skipti frá því að það var klesst á gamla bílinn minn. Að þurfa að labba niður á Lækjargötu í flauelsjakka, skyrtu og með fkn silkibindi í rigningu og þurfa að bíða þar eftir strætó, var ömurlegt og hálfgerð niðurlæging fyrir mig. Ég hlæ yfirleitt þegar ég sé busana í strætóskýlinu á leiðinni heim úr skólanum og keyri framhjá þeim, hugsandi til baka hvað var svekkjandi að horfa á bílastæðin hjá MS tæmast þegar ég þurfti að labba rúmlega km leið út að strætóskýlinu á Miklubrautinni.

Jólakveðjur frá Magga “gáfaða” Dan.

Svo var loksins ákveðið í gær að það mætti busa, en það var búið að ákveða að það mætti ekki. Bara formenn nefnda og nemendaráðið mátti busa í ár, og þar sem ég er formaður mátti ég busa! Ekki mátti nota nein efni á þau eða fötin þeirra, ekki einu sinni vatn.. Þannig að við létum þau þar með bara éta ýmislegt. Mysu og hákarl aðallega. Létum þau skríða í gegnum göng, tókum meikið af stelpunum með Euroshopper Baby Wipes rassaklútum og meikuðum strákana, klæddum þau í svarta ruslapoka, þau löbbuðu með nefið upp að veggnum alla leið í mötuneytið, svo þegar þau komu í gegnum göngin beið mysa og hákarl eftir þeim. Svo voru sérstaklega valdnir busar til að takaþátt í kókosbollu áti og að drekka gos með, en það var smá “catch”.. kókosbollurnar voru fullar af hákarli, mysing, tómatsósu og sinnepi. Og kókið var blandað 50/50 á móti mysu.. það var ælt og skyrpt gólfið. Snilld.

Svo er það bara busaballið í kvöld. Ég sem ætlaði ekki á það, skipti snögglega um skoðun þegar ég komst að því að formenn fá ókeypis. Geðveikt vika.

Leiter homes.

Ég fór til London með Örnu. Yndisleg ferð. Bróðir hennar býr í úthverfi borgarinnar og við gistum hjá honum og konunni hans. Það var verslað mikið á þessum sex dögum og skoðað helstu túrista staðina. Buckingham höll er drasl, en Big Ben er alveg jafn kúl og á myndum. Neðanjarðarlestakerfið er snilld, helsti kosturinn við London. Ég náði að fullkomna plötusafn mitt í Virgin Megastore og His Master’s Voice.

Bíllinn minn „eyðilagðist“. Það var keyrt aftan á mig og ég dæmdur í 100% rétti. Það borgaði sig ekki að gera við hann þannig að ég fæ hann borgaðan, þannig að það er bara nýr bíll í næstu viku. Hægt er að sjá myndir HÉR.

Ég var kosinn formaður/ritstjóri Pro Et Contra, sem er skólablað í FB. Einnig er ég í markaðsnefnd með Örnu.

Ég fékk vinnu í Samskip. Verð að taka úr gámum í allt sumar.

Annars hefur ekkert annað gerst. Prófin nálgast og þar með kærkomið sumarfrí.

Eina flotta mynd í lokin. Mér liggur greinilega mikið á hjarta.